Tuesday, 12 November 2013
سسئي داستان چوٿون
داستان چوٿون
1
متان وسارين، ووءِ ووءِ ڪَر وندرَ ۾؛
جي گوندر گذارين، سي تو چڱا ڏينھڙا.
2
چڱو گوندر غَمُ، جي مون پڇيو جيڏيون؛
مَنجھ ڪشالي ڪَمُ، آھي وِرھَ وارئين.
گوندر آھي غَرضُ، جي مُون سُڻو سَرتيون؛
فنا سڀ فَرضُ، ڪري سو سُنتَ سين.
4
گوندر جن گُذاريو، ڪاٿَـئُون سي لَھان؟
ھڪڙي رات رھان، وڃي وِرِھ وارئين.
5
گوندر جَن گذاريو، ڪاٿَـئُون لھان سي؟
حال پنھنجو ھي، وڃي ڏَسيان ڏکَن وارئين.
6
گوندر جن گذاريو، آءٌ تَنِين گولي؛
ھِنيَڙي ۾ ھولي، ھوندي ڏکن وارئين.
7
گوندر جن گذاريو، سُورَ پُڇَن سي ئي؛
پِرھ جِي پيئِي، تَنين مَٿي ماٽَڙي.
8
گوندر جن گذاريو، پيھي سي پُڇان؛
اُنھن لَڳ لُڇان، گھڻو آءٌ اُٻاڻِڪِي.
9
گوندر جن گذاريو، آءٌ پکي تن پيھِي؛
وٽانئُن ويھي، وٺان واسُ وِرِھ جو.
10
گوندر جن گذاريو، آءٌ تَنين گھوري؛
سدا مون جھوري، آھي ورھ وارئين.
11
گوندر جن گذاريو، مُنھن تَنِين مَشعَلَ؛
ڪا مون پوي ڪِل، اُنھن جِي افسوس جي.
12
گوندر جن گذاريو، مُنھن تَنِين مَھتاب؛
سنديون نِينھَن نواب، آھن ورھ واريون.
ڪافي 1
آڏو مانَ اَچن، وو، ڏسي منھنجو حال، ڀَلو!
ھو جي ڪيڙم ڪاف ۾، ڪوڪان پَونِن ڪَن.
ڪيچڙن جا ڪاڪِيون، تان رھبر واٽ رَسَن.
خبران ڏکن سنديون، اڳيون پاڻ پُڇَن.
ٻاروچان ٻاجھ پئي، چڱي آءٌ چَوَن.
پنڌَ ڪريندي پرينءَ ڏي، مَرُ پُرزا پيرَ ٿِيَن.
"سچو" پنھنجي ساٿ سان، نماڻِي به نِيَن.
ڪافي 2
آءٌ ٻانِھن جي سا ٻانھي، آھيان عيبدار، ميان!
عمر سڄيائي ڪوڙ ڪمايَم، بخش اُھو مونکي جاني.
روز ازل کـئُون اَبد تائين، آھي ڳچيءَ منھنجي ڳاني.
ڏوھ ڏِنگايون ڏِس نه منھنجون، محب ڪرين مھرباني.
ڪيئن "سچوءَ" جي دل سا دلبر، دوست ڪَيوَ ديواني.
ڪافي 3
مون کي نال نئين، نِي، اِھو ڪيچِڙَن جو قافلو، ميان!
اڱڻ شال اچي، نِي، اھو سپرينءَ جو ساٿڙو، ميان!
پٺيءَ ھوت پنھونءَ جي، ميان، ھلڻ سان ھِنئين، ني.
پُڄاڻان پرين جي، ميان، جِند ڪيئن جِئين، ني.
وڏي ٻاجھ ٻروچ کي، ميان، اُتي چَون اِئين، ني.
"سچو" چون سُڌير ٿي، ڀلو، پوندي مَھِر مِئين، ني.
ڪافي 4
مانَ اچن اُھي ڪاٿُون، مُئي ويا جي ماري!
سپريان ريءَ سرتيون، آھيان اُٻاڻي آئُون،
ويھان سي ڪيئن وساري.
پِرين ڏِس، وو، پاڻ ڏي، ميان، آھيان ڏُھارڻ آئون،
نيندا سي نال قطاري.
اچي اسان وٽ سپرين، ميان، اديون ڙي شال اوڏاھون،
مانَ ڪو ڏينھن گذاري.
آيا قاصد ڪيچ جا، ميان، اِئين سو مونکان اُتاھون،
يارُ سڄڻ توکي ساري.
آڌيءَ رات اُٿي ڪري، ميان، جَتَ ويا ھُئم جائون،
تائون سا نِتُ نھاري.
ھاري توسان ھوءِ جي، ميان، ڪي جي قول ڪيائون،
پرين اُھي سڀ پاري.
ويھين وساري وو اِتھين، ميان، ھيءَ نِڪار چَيائون،
"سچو" دوست سَنڀاري.
ڪافي 5
ڏاڍو جُدائيءَ جَلُ، ميان، ووءِ، ووءِ، ووءِ،
مون وٽَئُون ھوتَ مَ ھَلُ.
اَچي ويھُ اَکِن ۾، پاسي ٿيءُ نه پَلُ.
ڪيچ وڻن ڪم ڪھڙو، ڳالھ سانول اِھا سَلُ.
مُئِي کان منھنجا پرين، چوريءَ يارَ نه چَلُ.
ڪري ڪَشالا ڪاف ۾، لڌم ڪوھيارَلُ.
"سچوءَ" جي ني ساھ سان، ھُيا سي رلـمَلُ.
ڪافي 6
ڪندي سا ڪيئن قرار جيڏيون،
جنھن جو جيئڙو جَتَن سان!
وِرھ وارن کي سرتيون، ويجھو آھي وڻڪار.
ٻَڙيون، ٻاروچَل جو، نينھُن لڳم نروار.
محبت ڳِڌي نه لَڀي، خرچين لک ھزار.
ڏسنديس اکڙين سان، ڪاڪيون ڙي ڪوھيار.
ڇڏي لاڳاپا لوڪ جا، عشق ڪيم اِختيار.
سدا آھي "سچوءَ" کي، ڀينر بره بھار.
ڪافي 7
ھلان پنھل تو ساڻ،
ساڻ ھلي تنھنجي گولي گذاريندس.
ڇُلي پِيَس ڇَپرين، سَڱ ته توئي ساڻ.
ڪوجھي ڪاري ھان تنھنجي، پنھل پاڻ سڃاڻ.
توري توريندؤ ڪيترو، محبت وارو ماڻ.
توڙ نباھج تون ڌڻي، سھڻا "سچل" ساڻ.
ڪافي 8
ڳالھيون ڳُڻَ تنھنجا يار سَڄڻ، مون کي روز رئارن ٿا!
سِرَ تي سوز فراق جا، باري چاڙھيئي بار، سڄڻ،
ايڏانھن نيڻ نھارن ٿا.
منھنجو اندر اَڌُ ڪيو، جانب تنھنجي جارَ، سڄڻ،
مونکي ماڻا تنھنجا مارن ٿا.
پرين پاڙج پانھنجا، جي ڪَيَڙءِ قول قرار، سڄڻ،
منھنجو جيءُ جيارن ٿا.
ماڻھو شھر ڀنڀور جا، مِھڻا لک ھزار، سڄڻ،
مون کي ڏيھَ کَـئُون ڏيارن ٿا.
قاصد چون، وو، ڪيچ جا، تو ھُت سار سنڀار، سڄڻ،
توکي "سچو" پاڻ سنڀارن ٿا.
ڪافي 9
ڪنھن کي حال چوان ھي،
اَديون ڙي، واويلا، وو!
ڏيرن ڏيئي ڇڏيا، موٽي سور نوان ھي.
مھڻا محبوبن جا، ڏنا پاڻ اوھان ھي.
سُکَن اُتي سرتيون، ڏيان نه سور سنوان ھي.
ڪافي 10
مون کي دوست ڏنيون دلداريون،
جِيَس آءٌ تان، ني، وو جيڏيون!
ٻاجھ ٻاروچا تو پوي، سُڻِي ضعيفِ جون زاريون.
سئيون سڀيئي سڄڻن، عاجز جون آريون.
لٿا فلڪ فراق جا، آءُ تا گڏ گذاريون.
توکي تان تِرَ جيترو، وار نه وساريون.
سي ئي "سچو" آئيا، جن لءِ جھُونگاريون.
ڪافي 11
مون کي محب ويو ماري،
ڪنھن در ڏيان ھيءَ دانھڙي!
سوزُ تُنھنجو سُپرين، ڪوڪان ٿو ڪاري.
ھوت نماڻيءَ ھِنَ کي، ويھُ نه وساري.
نيو پورھيت پاڻ سان، پنھنجي ڪَڍَ قطاري.
ويو ٻاروچو نڪري، عاشق ھيءَ آزاري.
راتو ڏينھان سُپرين، "سچو" سَگ سنڀاري.
ڪافي 12
مون کي آڌر ڏي، ميان، سُھڻا ساٿيڙا، ڙي!
وڃي چئج پرينءَ کي، حال منھنجو ھي.
پريان سندي پار ڏھُون، قاصد اَچن ڪي.
وعدا پاڙج پانھنجا، جاني ڪِيڙءِ جي.
ھو جي ڪَيَو ڳالھڙيون، ساھ نه وسرن سي.
"سچو" سنگت پانھنجي، نانوَ ڌڻيءَ جي ني.
ڪافي 13
ڏونگر ڇو ٿو ڏکائين، پير پياديُن جا، ميان!
پنڌ ڪَرن جي ھوت پنھونءَ ڏي، تَن ڇو روھَ رھائين.
اِھو ڏوراپو ٿيندءِ اوڏاھين، ڇو طالِبُ ٿو ترسائين.
ھيئن تو گھرجي عاشقن سان، ميان ڪا مدد ڪرائين.
ڪَر ڪو ٿورو سگَ "سچوءَ" سان، مُحبَن ساڻُ ملائين.
هي تحرير ونڊيو
ليکڪ: رشيد سمون
Subscribe to:
Post Comments (Atom)
رشيد سمون جنهن جو تعارف هوئن ته سنڌ سلامت آهي پر سنڌي بلاگنگ جي دنيا ۾ نوان ٽيمپليٽ متعارف ڪرائي اهي سنڌين ۾ ورهائي سنڌي ٻولي جي ڪمپيوٽنگ جي دنيا ۾ اڳڀرائي ۽ سهڻي ڏيک ڏيڻ لاءِ ڪوشان ڪرڻ به سندس ئي ڪم آهي
0 تبصرا:
توهان به تبصرو موڪليو:
جيڪڏهن توهان جي ڪمپيوٽر ۾ سنڌي ڪيبورڊ انسٽال ٿيل ناهي ته سنڌي ۾ تبصرو لکڻ لاءِ هيٺين خاني ۾ سنڌي لکي ڪاپي ڪريو ۽ مٿئين تبصري واري خاني ۾ پيسٽ ڪري پبلش بٽڻ تي ڪلڪ ڪريو.۔